المدينة المجهولة الجزء الأول.
انت الوحيد اللي آمنته على السر ده.. مفيش غيرك معايا دلوقتي، وانا بيني وبين الموت نفَس، هتكمل بعد مني وهتكشف القلوب السوده والنيات الباطله وهتبين الحق وتنفذ عدل الله
.....
واحد من أيامنا الروتينيه اللي شبه بعضها، خلصنا محاضراتنا واتفقنا السهره النهاردة عند فايد، انا هجيب عشا وعمار هيجيب لزوم السهرة الحشيش والبيرة.
روحت من الجامعة مهدود نمت وصحيت ع المغرب ببص في تليفوني لقيت بهاء رن عليا 3 مرات رنيت عليه بسرعة لقيته بيسلم عليا وبيقولي فينك مش باين بقالك فترة؟
-والله انا في الكليه كل يوم انت اللي مش بتحضر
--والله كان عندي دور برد وسخونيه وبقالي كام يوم مبقدرش اروح الكلية
-لا الف سلامة عليك
--الله يسلمك، عاوزين نتقابل ونتلم وحشتني لمتكم الوسخة
-هنتجمع انهاردة انا وعمار ف بيت فايد متيجي؟
--خلاص هعدي عليك بعد نص ساعة كده نروح مع بعض
-مستنيك
وقفلت معاه ورجعت رنيت ع عمار قولتله متجيبش حاجة خلاص عشان بهاء جاي قالي تمام ماشي. بهاء محترم ومش بيتعاطى أي حاجة حتى السجاير مش بيحطها ف بوقه، ومش بيرن ولا بيطلب نخرج سوا غير لما يكون فيه حاجة مضايقاه وجايب اخره. وبعد نص ساعة عدا عليا ورحنا اتعشينا و خدنا سهرتنا وطول الوقت بهاء باين عليه الديق، الموضوع كبير وهو مش بيقول حاجة، حاولنا كتير نلطف ونضحكه وهو بيضحك من تحت من غير نفس عدا الوقت والساعة جت 2 وبهاء كان فصل، قال انا همشي يا جدعان بقا عشان الوقت اتأخر. قولتله خدني في طريقك
خرجنا وركبنا عربيته كان ماشي بسرعة غبيه وبكلمه ولا هو هنا، في لحظة جت عربية في المقابل بتحاول تعدي من عربية تاني جنبها بهاء مكانش عارف يعمل ايه، وعشان يتفاداها مال ع جنب والعربية اتقلبت.. الطريق كلها ضلمه وفاضيه ومفيش حد، صاحب العربيه اللي كان السبب في القلبه طار واللي جنب منه خلع برضو..
انا اتخبطت فوق عيني تعويرة بسيطة ودراعي اتجزع، بس بهاء دماغه اتفتحت جامد والدم كام مغرقه
-بهاء انت كويس؟ رد عليا يا بهاء!
--انا مش كويس يا باسل، باينلها النهاية
-نهاية ايه ياعم انت بتقول ايه!
--كنت عارف ان نهايتي قربت، بس بما إني خلاص هموت انت الوحيد اللي هآمنه على السر ده.. مفيش غيرك معايا دلوقتي، وانا بيني وبين الموت نفَس، هتكمل بعد مني وهتكشف القلوب السوده والنيات الباطله وهتبين الحق وتنفذ عدل الله هيفضل سر لوقت موتك وهتكون لحقت تسيبه في وصية لولادك، مش هتبقى موتتك زيي كده. فك مسامير الكاسيت، وخرجه هتلاقي تحته عقار، اشرب نصه بس وهو بيزيد كل 33 يوم، هناك هتقابل مازر. قوله أنا صديق بهاء النبيل، وإني موتت وهو هيفهمك كل حاجة..
قالي الكلمتين دول وسكت.. خلاص مات.. عدا يومين ع الحادثة وانا كنت في حالة لا احسد عليها.. صاحبي وصديق عمري مات قدام عيني ومقدرتش أعمله حاجه!
قعدت افكر فيه وجه في دماغي العقار اللي قالي عليه، جريت رحت على مكان الحادثة لقيت العربيه لسه مكانها، فكيت الكاسيت وطلعته ولقيت وراه العقار اللي قالي عليه.. خدته وانا مش فاهم أي حاجة. روحت عملت كوباية قهوة وحطيت عليها نص العقار زي ما قالي
لمدة دقيقتين مكنتش حاسس بحاجة، بدأت دماغي تتقل! ايه ده انا بخرج من جسمي؟ انا بطير!
لقيتني لا إراديًا طاير ورايح بره الكون خالص، فضلت طاير وبعدين رجعت تاني الأرض، بس كل حاجة كانت مختلفه، المباني بقت قديمة.. البيوت مش في نفس الأماكن، ناس لبسهم مدي على لبس العصر العباسي كده! الناس مستغرباني وبيبصولي نظرات غريبه.. جه واحد باين على وشه التحضر شويه، قالي انت مين؟
-أنا باسل
--باسل مين؟ وايه جابك هنا؟
-معرفش انا مش فاهم حاجة!
--محدش بيجي هنا تايه قول انت مين وإلا مصيرك الموت وهتتعلق على سور المدينه
-خلاص خلاص أفتكرت أنا باسل صديق بهاء النبيل ، هو اتوفى من يومين
--صديق المخلّص حبيب شعب البيسانا
-أيوة هو مات في حادثة وانا كنت معاه واداني العقار ده وقالي هتقابل مازر وهيفهمك كل حاجة
--أنا مازر، كنت عارف إن نهاية بهاء قربت، الله يرحمه. احنا شعب البيسانا، عايشين من 3 قرون على أرض البيسانا بعد ما شاع في أرض الفيروز المرض المدمر بعد ما كانت أرضنا ومعمرينها بقالنا آلاف السنين، مات نصف شعبنا بسبب المرض الغاشم واللي كان معدي. بدأنا بعد ما انتقلنا لأرض البيسانا نعمرها ونزرع فيها ونطلع خير الأرض.. خلال فترة ازدهار أرض البيسانا، حصلت حاجات غريبه ومكانش ليها أي تفسير، 7 أشخاص من شعب البيسانا كانوا بيشوفوا أحلام غريبه، بيشوفوا عالم غريب تاني مليان حاجات أغرب، عربات الخيول اتحولت لأشياء بتمشي لوحدها على دواليب من غير ما يجرها خيل، شكل البيوت غريب وجميل، كان شئ مروع، والأغرب ان ال7 كانوا بيشوفوا نفس الأحلام بنفس الأشكال والمواصفات، عرفنا وأيقننا اننا مش لوحدنا في الدنيا دي، وإن فيه عالم موازي عايش فيه ناس تانيين، علماءنا أصروا انهم يكتشفوا العالم ده وبالفعل بدأوا يعملوا تجارب عشان نقدر نروح العالم ده، البحث استمر اكتر من 70 سنه، لحد ما وصلنا أخيراً لعقار يخينا نروح العالم ده، بس للأسف مكانش أي حد يقدر يشوفنا، كان بعض منكم بس هو اللي بيشعر بوجودنا، منهم كان صاحبك بهاء، بدأ يجي عالمنا وينقل لينا تفكيركم وتحضركم، خلصنا من عادات كتير سيئه منتشره فينا، عرفنا على دينه واللي أغلبنا اتبعه وعشنا اكتر فترات حياتنا ارتياحيه بعده. في المقابل احنا نقلناله طاقتنا اللي شعب البيسانا بس بيتميز بيها.. معرفه الماكرين والخونه.. وكشف مخططاتهم..
تعالى بينا نروح العالم بتاعك عشان تفهم اكتر.
واداني جزء من ترياق تاني وهو خد وفي لحظة كنا في عالمنا.. عمار وفايد كانوا مستنييني في البيت ومفكريني نايم.. رجعت لوعيي قدامهم ومعايا مازر.. بس واضح انهم مكانوش شايفينه..
يتبع..
تعليقات: 0
إرسال تعليق