واداني جزء من ترياق تاني وهو خد وفي لحظة كنا في عالمنا.. عمار وفايد كانوا مستنييني في البيت ومفكريني نايم.. رجعت لوعيي قدامهم ومعايا مازر.. بس واضح انهم مكانوش شايفينه ولا حاسين بوجوده ، لحقني فايد واتكلم قبل ما يلاحظوا اني سرحان
-يلا بقا هنخلع احنا عارفينك منمتش من يوم الحادثة
--لا ياعم خليكم انا خلاص فوقت
-ياعم فوقت مين انت عنيك حمرا وباين عليك التعب دا اللي عنده دم احسن من اللي عنده عزبه وابقى نجيلك بكره ان شاء الله
-طيب ماشي هستناكم
--يلا تصبح على خير
-وانتوا من أهله مع السلامه
وخرجوا وانا بدأت اكلم مازر والحوار دار كده
-هما ازاي محسوش بيك وانا شايفك قدامي واقدر المسك عادي يعني مانتاش جن ولا شبح مثلاً!
--انا قولتلك ان ناس معدودة اللي تقدر تشوفنا، كان منهم صاحبك وانت بقيت زيه عشان خدت من العقار، وبعدين بطل الأسئلة الكتير دي نفس طبع صاحبك بعينه
-طيب خلاص مش هسأل تاني، احكيلي بقا عن قوتكم العجيبه الغريبه دي ووريني حاجة منها!
لقيته من غير ما يرد عليا بيحط إيده على دماغي وأنا حسيت بصداع خفيف، وبدأت أحس كأني بسترجع ذكريات قديمه بس هي بتحصل دلوقتي، كنت بشوف قدامي في الأول اشباح لشخصين.. بعد ما ركزت أكتر اتحققت من معالمهم، أيوة هما عمار وفايد.. مكانوش في بيتهم، ولا في الكليه ولا حتى عندي.. دماغي بتقولي ان ده كان من 3 أسابيع فاتوا.. كانوا في مكان ضلمه ومفيش فيه نور غير وميض خافت طالع من مشعل في ركن من الغرفه.. المكان دا، ايوة اكيد هو.. دا بيت ساحر! بس ايه موديهم هناك؟
بعد ما كنت شايف بس الموقف بدأت احس اني بسمع كمان، كأني وسطهم.. خرج عليهم واحد شكله بشع، شعره طويل ومنكوش، دقنه شكلها مرعب، لبسه قديم وغريب.. الساحر اللي هما عنده! ودار بينهم الحوار ده
الساحر : جايين ليه مش خدتوا مرادكم و
حصل اللي وعدتكم بيه؟
فايد: حصل ومن 5 شهور مستحملتش التعب وانتحرت بعد ما احتار الدكاتره في مرضها!
الساحر : اومال جايين ليه؟
فايد: عايزين نكمل انتقامنا، اخوها عايزين نجننه هو كمان ، هو اللي كان مقويها وواقف جنبها ورفضني وسابني مكسور وجالي اكتئاب مع إنه كان صاحب عمري..
ولسه الساحر هيرد عليه لقيت مازر شال إيده بعد ما حس اني دمعت!
أيوة هي، أختي سالي اللي انتحرت من 5 شهور.. بعد ما مسكها المرض اللي مكناش عارفينله كينونه، لفينا بيها على كل دكاترة مصر، صداع.. صداع كان بياكل في دماغها، كانت بتتقطع من الوجع وكل آهه كانت بتطلعها كانت بتطلع من قلبي معاها ومكناش عارفين نعمل ايه معاها.. لحد ما جابت اخرها ورمت نفسها من فوق، وماتت.. هو مش قصده عليها يا مازر صح! ميقصدش اختي أكيد، قولي بالله عليك هو ميقصدش سالي!
--للأسف قصدهم عليها يا باسل، نفس رد فعل صاحبك لما عرف ان مراد كان بيقابل خطيبته وبينهم علاقه محرمه.
-استنى مش مراد ده اللي لقوه مقتول في حديقة بيته!
--أيوة هو، وكان صاحبك اللي قتله. وهي دي الحاجات اللي كنا خايفين تتنقل لينا من عالمكم.. الخيانه ، والبغض لأقرب الناس ليك، والحقد اللي بقا مالي القلوب.
-طيب خليني أكمل هما عملولي ايه لما راحوا للساحر
وحط ايده على دماغي تاني وبدأت اسمع الساحر بيتكلم
الحجاب ده هتحطوه تحت المخده بتاعة صاحبكم، بمجرد ما ينام عليها مرة واحدة ويروح في النوم هيحصله نفس مصير اخته وهتخلصوا منه.
بسرعة شيلت ايد مازر وبصيت تحت المخده لقيت الحجاب موجود.. هما مكانوش جايين يتطمنوا عليا، كانوا جايين يقتلوني! شيلت الحجاب وبعد كده عرفت بعد ما سألت ازاي اتخلص منه، بس في نفس القعده كنت بسأل مازر هعمل ايه قولي!
--دي حاجة تخصك، شغلتنا نعرفك الحقيقة، والحكم ليك
-اقتلهم! هقتلهم وانتقم ، صاحبي اللي يقتل اختي ويخطط لقتلي عمره ما كان صاحبي، واللي ساعده لازم يموت معاه..
ولقيتني سايب مازر وخارج طلعت من البيت ركبت العربيه وفي طريقي لبيت فايد..
يتبع..
تعليقات: 0
إرسال تعليق